Falando de "Un hijo"

A sección do club de lectura do IES, "Os larpeiros", tivo a súa terceira reunión para falar da súa última lectura: "Un hijo" de Alejandro Palomas.

A pesar de que a participación no coloquio foi desigual, pois parte do alumnado partipante no club non perdeu aínda a vergoña, a visión xeral do alumnado foi dunha lectura que gustou, que emocionou e que fixo pensar.

As profesoras responsables desta sección do club de lectura animaron ao alumnado a reflexionar sobre temas tan variados como o loito pola morte dun ser querido, as diferenzas culturais por ter nacido nun determinado país ou a sensibilidade do protagonista fronte a certos temas.

Foi unha lectura emocionante que dende logo vos recomendamos a todos e todas.

Nesta ocasión desfrutamos duns deliciosos lazos de follado para adozar o noso encontro, que como se pode ver, xa non chegaron ás imaxes.

Nesta reunión tamén desvelamos ao alumnado participante cal ía a ser a nosa última lectura. Neste caso trátase de novela gráfica, un xénero literario do que moitos dos integrantes do club se mostraron asiduos. Neste caso imos  ler a novela gráfica "Subnormal. Una historia de acoso escolar", escrita por Fernando Llor e Miguel Porto. Esperamos que a súa lectura faga reflexionar ao noso alumnado sobre o acoso escolar, un tema que, por desgraza, segue a estar á orde do día.

Hoxe falamos de Presas fáciles

Quen non foi á praia cun libro baixo o brazo? Cantas lecturas quedaron na nosa memoria mesturadas co salitre e a area? Cantos títulos e historias quedaron unidas para sempre a un verán?

Xa vai sendo un clásico cando chega a primavera e o tempo acompaña achegarnos ao mar (porque por sorte o temos preto) e facer o noso encontro lector no medio das dunas ou no miradoiro de Punta Vicaño. E este ano non ía ser menos.

Presas fáciles foi o libro que tocaba nesta ocasión e foi unha obra que o que máis resaltaron as participantes foi o seu final, por inesperado. Que un grupo de anciáns no final das súas vidas idearan un plan para vingar aos seus amigos, vitimas dun sistema depredador, non o agardaban.

Engadiría tamén a calidade dos debuxos, a minuciosidade e o realismo como están debuxadas cada  unha das páxinas. A riqueza e variedade dos encadres e as expresións dos personaxes nos primeiros planos facían ver por momentos un filme.

Achegar ao alumnado tamén unha historia relativamente recente e que encheu durante meses as portadas dos xornais e  deixou un regueiro de damnificados foi tamén un dos puntos fortes da elección.

Aínda así, houbo críticas no sentido do ritmo da narración que consideraron excesivamente lento ou que algunhas delas non acaban de sentirse cómodas co thriller de asasinatos e a novela policial.

Para máis información sobre o libro podes picar AQUÍ

 

Finalistas I Concurso de Bookface

Estes son os finalistas do concurso de Bookface da biblioteca Letras de area. Participaron alumnos de 2º ESO e 4º de ESO maioritariamente, sendo as propostas moi conseguidas algunhas delas.

No instagram edl_iessanxenxo está aberta a votación para elixir os que serían o gañador e finalista desta edición. Aquí vos deixamos unha mostra dos traballos desta edición.

Diseño de Dinamización Sanxenxo

E a gañadora foi a alumna Valeria Ruíz de 4º ESO C

 

Abril adicado á banda deseñada

 

Este mes os dous grupos do noso club de lectura vano adicar a ler banda deseñada, concretamente os títulos Subnormal e Presas fáciles.

O primeiro título da autoría de Fernando Llor foi unha obra con moita repercusión ao tratar un tema que desgraciadamente afecta ano a ano a milleiros de nenos, nenas e adolescentes como é o acoso escolar.

Máis concretamente, o libro conta a historia persoal de Iñaki Zubizarreta, un ex-xogador de baloncesto profesional da ACB que quixo contar a súa historia persoal e que estivo a piques de afundilo nun pozo de difícil saída.

A historia, con escenas moi duras, ilustra unha realidade que deixa secuelas     que permanecen durante anos e incluso durante toda unha vida.

O grupo de 3º de ESO levou o libro Presas fáciles  de Miguelanxo Prado, o noso debuxante galego máis internacional.

Unhas hienas que acurralan un matrimonio anciá é a portada desta obra que conta unha historia recente que levou por diante a vida e os aforros de moitos cidadáns cando a crise financeira da década pasada.

A través dunha investigación policial coñecemos as prácticas dun sistema bancario corrupto que por manter o seu status non dubidou en levar por diante a quen fixese falta. 

 

Comentando "Cicuta para dous"

 O pasado mércores 21 de febreiro, a sección do clube de lectura dos "Larpeiros" reuniuse de novo para comentar a segunda lectura deste curso: "Cicuta para dous" de Rocío Leira.

Nesta ocasión, a reunión estivo endulzada por unhas rosquillas caseiras que trouxo unha das profesoras que leva o clube.

Entre petisco e petisco, andivemos comentando o que nos parecera a lectura. Deste vez todos e todas coincidiron en que lles gustara a lectura, ainda que moitos consideraron o final da historia como un pouco macabra.

Dos dous protagonistas da novela, Erundino e Irma, o alumnado do clube empatizou máis coa segunda, e a verdade é que do primeiro non tiñan moi boas palabras que adicarlle.

Ademais de falar da historia que se conta nas páxinas escritas con mestría por Rocío Leira, pois esta obra foi galardoada co Premio Jules Verne de Literatura Xuvenil, a historia tamén nos permitiu introducirnos no mundo da filosofía. Falamos de pensamento crítico, de poder cambiar de opinión co paso do tempo e tamén de ser quen de cortar cunha relación que xa nos está a traer só malos momentos.

Dende logo que foi unha boa elección a lectura de "Cicuta para dous", pois trátase dunha obra áxil e rápida de ler, que ademais inclúe pequenos enigmas de corte matemático que o lector debe ir resolvendo. E xa se sabe que todo o que ten algo de matemáticas, mellora notablemente.

Aproveitamos tamén a xuntanza para presentarlle ao alumnado a que será a terceira lectura do ano. Trátase de "Un hijo", obra escrita por Alejandro Palomas e galardoada co Premio Nacional de Literaruta Infantil e Xuvenil, que de seguro non lles vai deixar indiferente. O seu protagonista é Guille, un neno aparentemente feliz ao que lle encanta Mary Popins e que, a pesares da súa corta idade, terá moito que ensinarlles.

Veremos que nos contan na próxima reunión, agardamos que lles guste moito.

Encontro lector con Rocío Leira

 A gañadora do XIX Premio Jules Verne de Literatura xuvenil veu visitarnos para ter un encontro cos seus lectores.

No club de lectura lemos Cicuta para dous e xa anos atrás leramos tamén no club outro libro da mesma autora Trescatorcedazaseis.

En ambos casos son libros que tocan os mesmos mecanismos: intriga, suspense e un enigma que hai que resolver.

Se no libro de Trescatorcedezaseis as matemáticas eran o fío condutor que sobrevoaban uns estraños casos de crimes, en Cicuta para dous será a filosofía a pedra angular sobre a que facer as preguntas que nos leven ata o esclarecemento do caso.

Cunha narración áxil e entretida que pretende atrapar ao lector dende a primeira liña, Rocío Leira demostrou unha grande sintonía cos seus lectores.

Posta en común Por que todos me miran la cabeza?

Hoxe tocou falar do libro que estivemos lendo os últimos tempos e tiña moito para comentar. Comezando polo choque cultural, a falta de empatía ou a incomprensión á que se enfronta a protagonista.

O evidente é que non sempre unha decisión meditada acaba como unha espera e hai outros moitos factores que non dependen dun mesmo. Por este motivo Leila sente en ocasións que vai tirar a toalla e noutras se reafirma nas súas crenzas e en si mesma.

Tamén deu pé a falar  dos diferentes xeitos de entender a tradición e que iso non necesariamente se contrapón cunha maneira de vivir actual. Por ese motivo, vivimos o conflito familiar de Amal á que pretenden casar en contra da súa vontade.

O concepto de identidade tamén está presente no libro pois a protagonista é australiana, tamén musulmá  e a multiculturalidade da sociedade australiana non sempre está clara.

Este vídeo de Xavi Sala pode servir para seguir afondando no conflito que pon sobre a mesa o libro.

Concurso de Bookface

A biblioteca Letras de Area do IES Sanxenxo convoca o I Concurso de Bookface.

Pero, sabes o que é un Bookface?

Consiste en fundirse coa portada dun libro encaixando a cara ou calquera parte do corpo, valéndose de todos os complementos que queiras e, sobre todo, de moita imaxinación.

O único que precisamos para crear esta montaxe é dun libro, unha cámara de fotos ou un móbil.

Para facer un bo “bookface” debemos ter en conta outras variables: elixir un libro cunha portada onde poder darlle continuidade co noso corpo, roupa, pelo ou outros obxectos, mobles ou paisaxes da nosa contorna. Controlar as proporcións e as dimensións son outras cousas a ter en conta.

Agora, dálle á cabeciña e anímate a participar con cantas propostas desexes!!!

Envía os teus traballos ao correo: letrasdearea.iessanxenxo@gmail.com

 

Charla con Eva Mejuto

Tiñamos ganas de charlar con Eva Mejuto. Despois de 5 anos da súa primeira edición, Memoria do silencio é un dos libros máis lidos en galego entre o público xove. E por este motivo escollémolo no noso club de lectura.

A historia das irmás Touza, moitas veces denominadas as Schindler galegas, non debía quedar esquecida e iso mesmo foi o que nos contou a autora que chegou a ela case por casualidade.

Contounos que en realidade estaba traballando sobre Frieda Belinfante, unha chelista e directora de orquestra holandesa (a Frieda do libro) pero que lle falaron das irmás Touza e de todo canto fixeron e non dubidou en que aí estaba unha boa historia.

Desgraciadamente hai moi pouca documentación pero contou coa inestimable axuda  do historiador Ramón Estévez, fillo de Ramón Estévez, un home de 96 anos que colaborou puntualmente con Lola nunha ocasión para axudar a cruzar a un dos fuxidos.

Así, a partir de cada un dos personaxes e co pano de fondo do wolframio teceu unha historia emocionante e moi necesaria para ese público mozo falto de referentes positivos da nosa historia e máis de mulleres.

E deixou no aire esta pregunta: Por que coñecemos perfectamente a historia de Oscar Shindler e non temos idea do que pasou no noso propio país? Nos relatos que consumen/consumimos (filmes, series, libros) faltan aínda moitas historias que contar, especialmente do noso pasado. 

Grazas Eva por facer unha tarde diferente!

¿Por que todos me miran la cabeza?

¿Por que todos me miran la cabeza? será o vindeiro libro que leremos no Club de lectura.

Da autora de orixe palestina e afincada en Australia Randa Abdel-Fattah conta unha historia persoal con moito humor pero que ao tempo lle supuxo un grande conflito persoal e coa súa contorna social. Non hai máis que ver a portada para sabermos por onde vai o conto.

 

Amal, unha moza de dezaseis anos, conta que ocorre cando decide levar o hiyab posto como di ela “a xornada completa” nunha sociedade occidental e aínda que pareza o contrario non tan tolerante como a australiana. Os seus pais, de fortes conviccións relixiosas pero que educan á súa filla con total liberdade, tentan disuadila da súa decisión pois saben os atrancos aos que pode enfrontarse pero Amal está disposta a sobrepoñerse ante as adversidades.

Ademais seremos testemuñas do seu día a día, a música que escoita, en que pasa o tempo libre, as conversas coas amigas falando de cuestións amorosas etc...

Progresivamente veremos como o que empezou como algo espontáneo vaise convertendo nunha cuestión máis profunda e a súa personalidade vai evolucionando pois ve que non só quen está ao seu arredor xúlgana mal senón que tamén ela xulgou mal a outros e non soubo poñerse no seu lugar.

Randa Abdel-Fattah

A novela dá pé para tratar outros temas como a da tolerancia relixiosa, a afirmación da identidade, a sociedade de consumo ou a carencia de valores do estilo de vida occidental. En poucas semanas saberemos que pensan os membros do club, mentres tanto toca ir coñecendo pouco a pouco a Amal e a súa historia.

 

Falando de "El sueño de Berlín"

A sección Larpeiros do clube de lectura do IES Sanxenxo reuniuse o mércores 20 de decembro para falar do libro "El sueño de Berlín". En honra ao nome, a coordinadora do clube obsequiou aos participantes do mesmo cunha bandeza de pastas de té (que pouco durou na mesa) para facer máis confortable a reunión.

Durante os momentos que compartimos xuntos, falamos de empatía, compañeirismo, aceptación da diferencia e superación de medos, temas que se tratan na novela. Nótase que foi o primeiro encontro para moitos dos participantes, pois ao principio custou arrincar as palabras.

Como colofón final, a coordinadora ensinoulles unha miniatura do busto de Nefertiti que os protagonistas de historia, Ana e Bruno, acaban visitando no Neues Museum na cidade de Berlín.

A novela, en xeral, gustoulle aos membros do clube, pero algún deles comentou que en certos momentos se sentira algo agobiado polas descripcións dos episodios de TOC da protagonista, Ana.

Aproveitamos tamén esta reunión para facerlles entrega da seguinte lectura, titulada "Cicuta para dous", escrita pola matemática Rocío Leira e merecedora do XIX Premio Jules Verne de Literatura Xuvenil.

Agardamos que a lectura sexa interesante para todos, xa veremos que nos contan na próxima xuntanza.