RETOMOU A SÚA ANDAINA O NOSO CLUB DE LECTURA "LENDO O MUNDO"

 

 

 

En outubro botou andar de novo o noso club de lectura LENDO O MUNDO coa novidade de que este curso temos varias seccións temáticas, vinculadas ao tema da Semana cultural deste curso 24-25. Este ano a Semana cultural do IES Sanxenxo xira ao redor de Xulio Verne e os seus libros de viaxes e de ciencia ficción. En parte por iso e porque foron as temáticas preferidas polo alumnado, este curso temos tres seccións temáticas con dúas coordinadoras en cada unha: “Viaxes e cine”, “Ciencia ficción e novela negra” e “Historia e Banda deseñada”.

Rematando o curso dos Larpeiros con "Subnormal. Una historia de acoso escolar"

O pasado mércores 22 de maio tivo a última reunión do curso da sección "Os larpeiros" do clube de lectura. Nesta ocasión, estivemos un anaco reunidos para comentar o que nos parecera o libro "Subnormal. Una historia de acoso escolar".

Por ser esta a última reunión do curso, era o alumnado o encargado de traer os doces cos que aderezar o comentario da lectura, pero como se pode ver nas fotografías, eses doces quedaron esquecidos nun sitio moi lonxano á biblioteca do instituto.

Xa metidos en faena para comentar o libro, a maioría dos participantes comentou que lle fora unha lectura sinxela e rápida, por tratarse dunha novela gráfica, e que ademais lle gustara bastante. Algunha das persoas tamén comentou a dureza dalgúns dos pasaxes do libro, e que neses momentos o pasara un pouco mal coa súa lectura.

Ademais de comentar a lectura, estivemos falando do problema do acoso escolar, compartindo vivencias e, sobre todo, deixando claro que o máis importante é saber pedir axuda, tanto se sexa a persoa afectada como un simple espectador. Ademais de falar de acoso escolar, falamos tamén de suicidio, tema que aparece na lectura e que nos preocupa moi seriamente.

Foi unha reunión na que se falaron de moitas cousas importantes e na que comezamos a escoitar a opinión dalgúns dos membros do club que ata o de agora non participaran moito.

Esperamos que esta experiencia fora interesante e enriquecedora para todos o alumnado participante e que o ano que vén se animen a volver a participar nela. Sexa como sexa, que nunca falten os libros e as boas historias, pois sempre poden ser un lugar onde refuxiarse, evadirse, coñecer e conectar.

Falando de "Un hijo"

A sección do club de lectura do IES, "Os larpeiros", tivo un novo encontro para falar da súa última lectura: "Un hijo" de Alejandro Palomas.

A pesar de que a participación no coloquio foi desigual, pois parte do alumnado participante no club non perdeu aínda a vergoña, a visión xeral do alumnado foi dunha lectura que gustou, que emocionou e que fixo pensar.

As profesoras responsables desta sección do club de lectura animaron ao alumnado a reflexionar sobre temas tan variados como o loito pola morte dun ser querido, as diferenzas culturais por ter nacido nun determinado país ou a sensibilidade do protagonista fronte a certos temas.

Foi unha lectura emocionante que dende logo vos recomendamos a todos e todas.

Nesta ocasión desfrutamos duns deliciosos lazos de follado para adozar o noso encontro, que como se pode ver, xa non chegaron ás imaxes.

Nesta reunión tamén desvelamos ao alumnado participante cal ía a ser a nosa última lectura. Neste caso trátase de novela gráfica, un xénero literario do que moitos dos integrantes do club se mostraron asiduos. Neste caso imos  ler a novela gráfica "Subnormal. Una historia de acoso escolar", escrita por Fernando Llor e Miguel Porto. Esperamos que a súa lectura faga reflexionar ao noso alumnado sobre o acoso escolar, un tema que, por desgraza, segue a estar á orde do día.

Hoxe falamos de Presas fáciles

Quen non foi á praia cun libro baixo o brazo? Cantas lecturas quedaron na nosa memoria mesturadas co salitre e a area? Cantos títulos e historias quedaron unidas para sempre a un verán?

Xa vai sendo un clásico cando chega a primavera e o tempo acompaña achegarnos ao mar (porque por sorte o temos preto) e facer o noso encontro lector no medio das dunas ou no miradoiro de Punta Vicaño. E este ano non ía ser menos.

Presas fáciles foi o libro que tocaba nesta ocasión e foi unha obra que o que máis resaltaron as participantes foi o seu final, por inesperado. Que un grupo de anciáns no final das súas vidas idearan un plan para vingar aos seus amigos, vitimas dun sistema depredador, non o agardaban.

Engadiría tamén a calidade dos debuxos, a minuciosidade e o realismo como están debuxadas cada  unha das páxinas. A riqueza e variedade dos encadres e as expresións dos personaxes nos primeiros planos facían ver por momentos un filme.

Achegar ao alumnado tamén unha historia relativamente recente e que encheu durante meses as portadas dos xornais e  deixou un regueiro de damnificados foi tamén un dos puntos fortes da elección.

Aínda así, houbo críticas no sentido do ritmo da narración que consideraron excesivamente lento ou que algunhas delas non acaban de sentirse cómodas co thriller de asasinatos e a novela policial.

Para máis información sobre o libro podes picar AQUÍ

 

Finalistas I Concurso de Bookface

Estes son os finalistas do concurso de Bookface da biblioteca Letras de area. Participaron alumnos de 2º ESO e 4º de ESO maioritariamente, sendo as propostas moi conseguidas algunhas delas.

No instagram edl_iessanxenxo está aberta a votación para elixir os que serían o gañador e finalista desta edición. Aquí vos deixamos unha mostra dos traballos desta edición.

Diseño de Dinamización Sanxenxo

E a gañadora foi a alumna Valeria Ruíz de 4º ESO C

 

Abril adicado á banda deseñada

 

Este mes os dous grupos do noso club de lectura vano adicar a ler banda deseñada, concretamente os títulos Subnormal e Presas fáciles.

O primeiro título da autoría de Fernando Llor foi unha obra con moita repercusión ao tratar un tema que desgraciadamente afecta ano a ano a milleiros de nenos, nenas e adolescentes como é o acoso escolar.

Máis concretamente, o libro conta a historia persoal de Iñaki Zubizarreta, un ex-xogador de baloncesto profesional da ACB que quixo contar a súa historia persoal e que estivo a piques de afundilo nun pozo de difícil saída.

A historia, con escenas moi duras, ilustra unha realidade que deixa secuelas     que permanecen durante anos e incluso durante toda unha vida.

O grupo de 3º de ESO levou o libro Presas fáciles  de Miguelanxo Prado, o noso debuxante galego máis internacional.

Unhas hienas que acurralan un matrimonio anciá é a portada desta obra que conta unha historia recente que levou por diante a vida e os aforros de moitos cidadáns cando a crise financeira da década pasada.

A través dunha investigación policial coñecemos as prácticas dun sistema bancario corrupto que por manter o seu status non dubidou en levar por diante a quen fixese falta.